പട്ടത്തിപ്പാറ ജലസമൃദ്ധിയുടെ ദൃശ്യഭംഗി.

പട്ടത്തിപ്പാറയിൽ ജലസമൃദ്ധിയുടെ ദൃശ്യഭംഗി. പാണഞ്ചേരി പഞ്ചായത്തിലെ ചെമ്പൂത്രയിൽ ദേശീയപാത 47ൽനിന്ന് രണ്ടു കിലോമീറ്റർ അകലെയാണ് പട്ടത്തിപ്പാറയെന്ന വെള്ളച്ചാട്ടം. വെള്ളച്ചാട്ടത്തിന് 400 മീറ്റർ അകലെ വരെ വാഹനത്തിലെത്താം.

വെള്ളാനി മലയിലെ കണ്ണക്കാട് ഉൾവനത്തിൽ നിന്നാരംഭിച്ച് മുകൾ ഭാഗത്ത് പരന്നൊഴുകി നൂറ്റിയിരുപതടി ഉയരത്തിലെ ചെങ്കുത്തായ പാറയിലേക്ക് പതിക്കുന്ന വെള്ളച്ചാട്ടം ജൂൺ മുതൽ ഡിസംബർ വരെയുള്ള മാസങ്ങളില്‍ ജലസമൃദ്ധമാണ്.

പാറക്കെട്ടുകളിൽ പതിച്ച് കരിക്കാമ്പുഴ തോടായി മാറി കല്ലായിച്ചിറയിലെത്തുന്ന വെള്ളം നാലു കിലോമീറ്റർ ചെറു പുഴയായ് ഒഴുകി മണലിപ്പുഴയിൽ പതിക്കുന്നു.

തൃശൂർ – പാലക്കാട് ദേശീയപാതയിൽ പതിനൊന്ന് കിലോമീറ്റർ സഞ്ചരിച്ച് ചെമ്പൂത്രയിൽ നിന്ന് വടക്കോട്ട് തിരിഞ്ഞ് രണ്ടു കിലോമീറ്റർ ദൂരം സഞ്ചരിച്ചാൽ പട്ടത്തിപ്പാറയിലെത്താം.